სიახლეები

ყველაზე უჩვეულო ბოლო ზარი მე-12 კლასელების ცხოვრებაში .

ვირტუალური და ძალზე ემოციური ბოლო  ზარი დაირეკა იტალიური სკოლის ონლაინ სივრცეში. კეთილი სურვილები, თვალცრემლიანი მოსწავლეები, მასწავლებლები და მშობლები.

ძვირფასო მე-12 კლასელებო, გილოცავთ თქვენი ცხოვრების ერთ-ერთ უმნიშვნელოვანეს მოვლენას - სკოლის დამთავრებას. გისურვებთ წარმატებებს თქვენი ცხოვრების  ახალ ეტაპზე

17 მაისს, 12:00 საათზე ინგლისური ენის კათედრის პედაგოგის შორენა მერაბიშვილის ხელმძღვანელობით XI კლასის მოსწავლეებმა ჩაატარეს ონლაინ კონფერენცია თემაზე ,,მდგრადი განვითარების მიზნები.”

კონფერენციაში მონაწილეობა მიიღო მე-11 კლასის ყველა მოსწავლემ, მათ მიერ განხილულ იქნა მდგრადი განვითარების 17 მიზანი და 169 ამოცანა, რომლებიც ურთიერთდაკავშირებულია და სამ განზომილებაში ერთიანდება – ეკონომიკური, სოციალური და გარემოს დაცვითი. მოსწავლეებმა იმსჯელეს თითოეული მიზნის მნიშვნელობაზე და ამოცანებზე, 2030 წლის დღის წესრიგზე, რომელიც ამ ეტაპზე არსებული ერთადერთი გლობალური დღის წესრიგია, რომლის შესრულებაშიც ყველა ქვეყანა თანაბრად ერთვება და რომლის მთავარი გზავნილია „არავინ დარჩეს პროცესის მიღმა“ (leaving no one behind).

კონფერენციის მონაწილეებმა წარმოადგინეს საქართველოს სტრატეგია მდგრადი განვითარების მიზნების განხორციელების ხელშეწყობისა და მონიტორინგისათვის.კონფერენციამ საკმაოდ საინტერესო და  უჩვეულო გარემოში ჩაიარა

დღეიდან, ლიტერატურული კლუბის ფარგლებში მოქმედ ლიტერატურულ კაფე ,,Libriamoci –თან   იხსნება რუბრიკა ,,კრიზისი, როგორც შესაძლებლობა...“

პანდემიის გამო სასკოლო საზოგადოებამ გამოხატა თანაგრძნობა, სადაც   იტალიაზე ეწერა:  ,,ქვეყანა სადაც ერთმანეთს ჰარმონიულად შეერწყა ღვთისა და ადამიანის შემოქმედება, სადაც უსაზღვრო მშვენიერების მხილველის სული შვებას გრძნობს... ,,სილამაზე მართლაც იხსნის სამყაროს"... იტალიელებისთვის La vita è bella - ცხოვრება მშვენიერია მიუხედავად ყოველგვარი განსაცდელისა... „

და აი, ამ კრიზისის დროს იტალიაში ბევრი მშვენიერი ლექსი და სიმღერა შეიქმნა.

ჩვენი  მაესტრა რუ (იტალიური ენის პედაგოგი, ლიტერატურული კლუბის ხელმძღვანელი რუსუდან ყოინაშვილი) გვთავაზობს,  იტალიელი პოეტის სიმონე კრისტიკის  ამ დღეებში შექმნილი ლექსის თარგმანს. დოსტოევსკის ნათქვამი ,,სილამაზე იხსნის სამყაროს", სიმონე კრისტიკმა  დაასრულა: ,,მაგრამ სილამაზე ჩვენ უნდა გადავარჩინოთ" .სიმონე კრისტიკი პოეტი და მომღერალია. მაესტრა რუს მეგობრებმა  იტალიიდან გადმოუგზავნეს ვიდეო რგოლი:

იხილეთ ვიდეო

რუბრიკა გაგრძელდება, პერიოდულად ჩვენი მოსწავლეები და პედაგოგები შემოგვთავაზებენ, კრიზისულ პერიოდში, იტალიელების მიერ შექმნილ სიმღერებსა და  ლექსების თარგმანს.

 

 2020 წლის მაისი.

რუსუდან ყოინაშვილის თარგმანი:

 

,,შეგონებები ოთხკედელში გამოკეტილს

დღეს გამომწყვდეული ხარ ოთხკედელში,

და ამ ცხოვრებას ღრიჭოდან  უჭვრეტ,

ხარ დათრგუნული, მხარნაქცევი და უგუნებო,

და შენ ანარეკლს სარკეში უცქერ.

მიიღე ციურ წყალობად ეს დრო,

გახსენი ფრჩხილი,შეიცან თავი,

და თაროებზე მიძინებულ

იმ წიგნებს შორის,

ამოარჩიე ორიოდე,მაგრამ

მთავარი.

დანარჩენი კი დიდ ყუთს

მიანდე,

აჩუქე სკოლებს შეძლებისგვარად.

შეიქმენ სივრცე,

ნუ მოეშვები...

სულ ცოტა კმარა,

უკეთ რომ გახდე.

წერე წერილი,

წერე ლექსები,

და ამ მოწყენას ფანტაზიით მოუღებ ბოლოს,

აი ფურცელი, აი ფერები,

დახატე რამე,

თუგინდ იყავი მიკელანჯელო,ანდა მღებავი.

მთავარი მხოლოდ ერთია

ამ დროს,

შენ თავში ბავშვი აღმოაჩინო...

გაითბე გული მათი ჩამოთვლით, ვინც მართლა გიყვარს,ვისაც

უყვარხარ.

და გაიხსენე ბედისწერა

მათთან შეხვედრის,

იგრძენი მათი სიახლოვე

და დამშვიდდები.

მოწყენილობა გონს რომ

დაბინდავს,იპოვე ხერხი

თავისდაღწევის.

და როგორც ბავშვმა, ანდა

პოეტმა ცნობისმოყვარემ, ან ასტრონავტმა

აღმომჩენმა ახალ პლანეტის,

იპოვე არსი,ეფემერულს 

ანებე თავი...

და ჩაკეტილიც ამ ოთხკედელში,

შეძლებ რომ იყო

თ ა ვ ი ს უ ფ ა ლ ი!!!

 

ეწვიეთ კლუბის ვებ-გვერდს

სახვითი და გამოყენებითი ხელოვნების პედაგოგი, ეკატერინე მელქაძე.

იტალიური სკოლის I - VI კლასის უნიჭიერესი მოსწავლეები გამოგზაურებენ მშვენიერების სამყაროში, რომელსაც ხელოვნება ჰქვია, ისინი გვაზიარებენ მათ მიერ აღქმულ სამყაროსა და ხელოვნებისადმი დიდ სიყვარულს. 

ხელოვნება ხომ თერაპიაა, ის გვიფერადებს და საინტერესოს ხდის ცხოვრებას, განსაკუთრებით დღეს, როდესაც უჩვეულო ცხოვრების წესი მსოფლიო პანდემიის გამო შეგვექმნა.
ონლაინ გამოფენა, რომელსაც გთავაზობთ თავად დაგარწმუნებთ, თუ რაოდენ ნიჭიერები და შემოქმედებითები არიან იტალიური სკოლის მოსწავლეები.

გაიცანით საბუნებისმეტყველო მეცნიერებათა კათედრა: მაია ცინაძე -კათედრის ხელმძღვანელი (ფიზიკის პედაგოგი); ზაირა ბესტავაშვილი, რუსუდან ჯაფარიძე (ქიმიის პედაგოგები); ცისია სუხიაშვილი, მარინა ხომასურიძე (ბიოლოგიის პედაგოგები).

როგორც ყველა სხვა, საბუნებისმეტყველო მეცნიერებათა კათედრა ახალ რეალობაში იმყოფა, პედაგოგებმა წარმატებით დაძლიეს ახალი გამოწვევა, დისტანციური სწავლების პრინციპებზე დაყრდნობით მოახერხეს სასწავლო პროგრამების ადაპტაცია. ონლაინ გაკვეთილები შეუფერხებლად მიმდინარეობს, მადლობა სკოლის ადმინისტრაციას, პედაგოგებს, მოსწავლეებსა და მათ მშობლებს.
კათედრის წევრებმა საპროგრამო მასალის თემატიკის მიხედვით, თავიანთი შექმნილი ელექტრონული რესურსების გამოყენებით, გაცილებით ხალისიანი გახადეს ონლაინ გაკვეთილების მიმდინარეობა. თითოეული პედაგოგი დისტანციური სწავლების რეჟიმის პირობებშიც ადვილად გასაგებს ხდის ახალ მასალას, მოსწავლეებს ცოდნას აჯამებინებს და ამყარებს უკუკავშირს.
აპრილის თვეში უჩვეულოდ, დისტანციურ სწავლების პერიოდში, დაიწყო საბუნებისმეტყველო მეცნიერებათა კათედრის კვირეული.
ეტაპობრივად წარმოგიდგენთ კვირეულის ფარგლებში, კლასებისა და საგნების (ფიზიკა, ქიმია, ბიოლოგია) მიხედვით, მოსწავლეთა მიერ მომზადებულ მრავალფეროვან ნამუშევრებს პრეზენტაციების და ონლაინ პროექტების სახით.
იხილეთ XI კლასის მოსწავლეების: მარიამ კარავასილისის, ლილი კერესელიძის, მარიამ ჩახავას, თამთა ათოშვილისა და თათია ბარელაძის პრეზენტაციები თემაზე ,, 5G გამოსხივება და კორონავირუსი-მითი თუ სინამდვილე“ - ფიზიკის პედაგოგი, მაია ცინაძე.

მასწავლებელთა პროფესიული განვითარების ცენტრის, ინტერნეტგაზეთ მასწავლებლის ოფიციალურ საიტზე, გამოქვეყნდა იტალიური სკოლის, დაწყებითი კლასების კათედრის ხელმძღვანელის, წამყვანი მასწავლებლის ნანა ვაჩიბერიძის მეთოდური სტატია.

სტატიაში ქალბატონი ნანა თავის გამოცდილებას და რესურსებს უზიარებს მთელი საქართველოს მასწავლებლებს, იგი ათეულობით ელექტრონული სასწავლო რესურსის ავტორია.

 წარმატებებს ვუსურვებთ ქალბატონ ნანა ვაჩიბერიძეს.

http://mastsavlebeli.ge/?p=25723

ვაგრძელებთ იტალიური სკოლის პროფესიონალთა გუნდის წარდგენას,  ამ ეტაპზე წარმოგიდგენთ მათემატიკის კათედრას: მანანა თოფურია (კათედრის ხელმძღვანელი), ანა ნატროშვილი, მანანა ჭინჭარაული, კახა ნიკოლაიშვილი, დავით თარაშვილი.

იტალიური სკოლის მოსწავლეებისათვის. ხალისით და საინტერესო სიახლეებით იწყება და მთავრდება ონლაინ გაკვეთილები მათემატიკაში. სასწავლო პროცესში  აქტიურად გამოიყენება   ვიდეო მასალები,  სასწავლო პროგრამები და თამაშები.

პედაგოგები,  მათ მიერ შექმნილი ელექტრონული რესურსებით, პრეზენტაციებით, პროექტებით, მოსწავლეთათვის მრავალფეროვანს, ადვილად გასაგებს და ხელმისწვდომს ხდიან ახალ მასალას, აჯამებენ ცოდნას და აკეთებენ უკუკავშირს.

წარმოდგენილ ფოტოებზე ასახულია მე-6 კლასის მოსწავლეთა აქტივობების მცირე ნაწილი მათემატიკაში - პედაგოგი მანანა თოფურია.

მადლობას ვუხდით ჩვენს არაჩვეულებრივ ბავშვებს და მათ მშობლებს  თანამშრომლობისთვის. მართლაც, საოცარი მონდომებით  ასრულებენ ბავშვები დავალებებს და კრეატიულად იყენებენ ყველაფერს, რაც მათთვის ხელმისაწვდომია მოცემულ სიტუაციაში.

განსაკუთრებული მადლობა კი პედაგოგებს, რომ ასე საინტერესოდ, მრავალფეროვნად და შემოქმედებითად წარმართავენ საგაკვეთილო პროცესს. 

გაიცანით იტალიური სკოლის დაწყებითი კლასების კათედრის პროფესიონალთა გუნდი: ნანა ვაჩიბერიძე (კათედრის ხელმძღვანელი), ინგა თეთრაძე, დალი ქოქოშვილი, მაია ალავიძე.

სკოლის წარმატების საწინდარი  პროფესიონალთა გუნდია! ამ ახალმა გამოწვევამ, კიდევ ერთხელ დაგვარწმუნა (და არა მხოლოდ ჩვენ), რომ ჩვენი სკოლის პედაგოგები, ჩვენი ძლიერი რგოლია, ჩვენი საფუძველი და საყრდენია!

იტალიური სკოლის პედაგოგებმა, ამ რთულ პერიოდშიც წარმატებით დაძლიეს ეს ახალი გამოწვევა და დისტანციური სწავლების პრინციპებზე დაყრდნობით მოახერხეს სასწავლო პროგრამების ადაპტაცია ისე, რომ გაკვეთილები საინტერესო, ხარისხიანი და შედეგზე ორიენტირებული იყოს. ამის ერთ-ერთ დასტურად კი გვსურს, ყველას გავუზიაროთ დაწყებითი კლასების კათედრის მიერ საპროგრამო მასალის თემატიკის მიხედვით შექმნილი ათეულობით ელექტრონული რესურსიდან რამდენიმე, რომელთა გამოყენებითაც გაკვეთილები უფრო სახალისო და ეფექტური გახდა.

ნახატი ფილმის გააზრება

მეტყველების ნაწილები

ბუნებრივი მოვლენები

კოგნიტური გადაატვირთვის თავიდან აცილების მიზნით, გაკვეთილები ტარდება განსხვავებულ ფორმატში, პედაგოგთა ძალისხმევა მიმართულია ისეთი აქტივობების გამოყენებაზე, რაც ხელს უწყობს მასალის წარმატებულ ათვისებას. ასევე, სრულიად განსხვავებული მიდგომები დაინერგა, მშობლებთა თანამონაწილეობით, საშინაო დავალებების შესრულებისა და უკუკავშირის კუთხით.

კათედრის მასწავლებლებმა შეიმუშავეს და დანერგეს სტრატეგიები და პროექტები, რაც მოსწავლეებს ეხმარებათ პოზიტიური ემოციების გენერირებაში და რასაც პანდემიის პირობებში, უდიდესი მნიშვნელობა აქვს, გასაკუთრებით დაწყებით კლასებში.

გვეამაყებით და გვეიმედებით, ჩვენო ძვირფასებო! გვინდა, რომ ყველას გავუზიაროთ თქვენი დაუღალავი შრომისა და შედეგების შესახებ!

იტალიური სკოლა აგრძელებს მოსწავლეთა მიღებას დისტანციურ რეჟიმში.

სკოლის ადმინისტრაციის წარმომადგენელთან გასაუბრების საფუძველზე, ონლაინ რეჟიმში, უზრუნველყოფილი იქნება მოსწავლის პირველ კლასში დარეგისტრირება და საბუთების მიღება.

ზედა კლასებში, ვაკანსიის შემთხვევაში, ასევე, ონლაინ რეჟიმში მოსწავლესთან გასაუბრების საფუძველზე, მოხდება მოსწავლეთა დარეგისტრირება შესაბამის კლასში.

დამატებითი ინფორმაციისათვის გთხოვთ, დაგვიკავშირდეთ:   599 153 181; 599 730 370.

გისურვებთ ჯანმრთელობას და ვიმედოვნებთ, მალე ცხოვრების ჩვეულ რეჟიმს დავუბრუნდებით!

იტალიელები ყოველდღიურად ამტკიცებდნენ, რომ გენიალური ერია, ქვეყანა სადაც ერთმანეთს ჰარმონიულად შეერწყა ღვთისა და ადამიანის შემოქმედება, სადაც უსაზღვრო მშვენიერების მხილველის სული შვებას გრძნობს... ,,სილამაზე მართლაც იხსნის სამყაროს"... იტალიელებისთვის La vita è bella - ცხოვრება მშვენიერია მიუხედავად ყოველგვარი განსაცდელისა...

იტალიური სკოლა ,,ცისკრის" სასკოლო საზოგადოება ბედნიერია, რომ იტალიური სკოლის კედლებში ქართველი ბავშვები ამ უდიდესი კულტურის მქონე ქვეყნის ენას ეზიარებიან...

ბედნიერებაა ასწავლო ის, რაც გიყვარს და ასწავლო მათ, ვინც გიყვარს!

იტალიის დღევანდელი მდგომარეობა თითოეული ჩვენგანის ტკივილია, ვიმედოვნებთ, რომ ყველა სიძნელე დაძლეული იქნება და სილამაზე, სიყვარული, სითბო და თანადგომა იხსნის იტალიას. მიუხედავად მძიმე დღეებისა, იტალია ამასაც გადალახავს. ჩვენ თქვენს გვერდით ვართ!

 

Gli italiani ogni giorno danno il buon esempio a tutto il mondo. E' veramente un popolo geniale e l'Italia è veramente il "Belpaese" dove la creazione di Dio e quella dell'uomo è in gran armonia, dove l'anima trova la pace e la consolazione guardando una Bellezza capace di salvare il mondo. Per gli italiani "la vita è bella" malgrado tutto.

La scuola italiana ,,Tsiscari" è veramente fortunata nel dare la possibilità ai ragazzi di imparare una bellissima lingua di gran cultura. Anche noi, insegnanti siamo felici di insegnare ciò che amiamo tanto e ci rende ancor più grati insegnarlo a chi vogliamo bene, ai bambini...

Lo stato attuale dell'Italia è un dolore per tutti noi, speriamo che le difficoltà  vengano superate presto. La bellezza, l'amore, l'affetto ed il sostegno di tutti salveranno l'Italia. Si è un momento difficile, ma l'Italia ce la farà. 

Siamo con voi!

16 მარტიდან იტალიური სკოლა გადავიდა ელექტრონულ სწავლებაზე.

წინასწარ შექმნილი დისტანციური სწავლების სივრცეში,  პირველად ჩატარდა ონლაინ სწავლების საათობრივი ბადით გათვალისწინებული გაკვეთილები.

დისტანციური სწავლების ორგანიზებულობა ჩვენი გუნდის პროფესიონალთა დამსახურებაა. მადლობას ვუხდით საგნობრივ კათედრებს გუნდური მუშაობისთვის, მასწავლებლებს, კლასის დამრიგებლებს, თავად მოსწავლეებსა და მათ მშობლებს.

კარგი დასაწყისი წარმატების საწინდარია.

გისურვებთ, ნაყოფიერ მუშაობას და ჯანმრთელობას!

25 თებერვალს იტალიური ენის კვირეულის ფარგლებში, მოეწყო კოსტუმირებული პრეზენტაცია “იტალიური კარნავალი“.

VI კლასის მოსწავლეებმა დამსწრე საზოგადოებას გააცნეს იტალიის კულტურა, ტრადიცია, წარმოადგინეს და დაახასიათეს ვენეციის პერსონაჟები.

პრეზენტაციას უძღვებოდა იტალიური ენის პედაგოგი  ქეთი სიხარულიძე.

21 თებერვალს იტალიური ენის კვირეულის ფარგლებში, VIII კლასის მოსწავლეებს ავერსის კლინიკის ლაბორატორიაში  ჩაუტარდათ ბიოლოგიის გასვლითი გაკვეთილი.

გაკვეთილს უძღვებოდა - იტალიური სექტორის ბიოლოგიის პედაგოგი ელენე წიწილაშვილი

I ragazzi dell’ ottava classe in visita al laboratorio “Aversi”

20 თებერვალს, იტალიურ სკოლში ჩატარდა სემინარი ,,მედიაწიგნიერება აზარტული თამაშების წინააღმდეგ", რომელსაც ახორციელებს კავკასიის მედიის სკოლა.

კვლევა მიმდინარეობს 2019 წლის დეკემბრიდან.

კვლევის მიზანია სპეციალური სემინარების საშუალებით სკოლის მოსწავლეთა ცნობიერების ამაღლება, იმასთან დაკავშირებით, თუ როგორ ცდილობს აზარტული თამაშების ინდუსტრია მათ თამაშში ჩართვას რეკლამებისა და სხვადასხვა ფსიქოლოგიური ხრიკების საშუალებით.

2020 წლის 19 თებერვალს იტალიურ სკოლა ,,ცისკარში" გაიხსნა იტალიური ენის კვირეული.

კვირეული გაიხსნა საქართველოში იტალიის საგანგებო და სრულუფლებიანი ახალი ელჩის, ბატონი ენრიკო ვალვოს სტუმრობით.

უსაფრთხო სკოლის კონცეფციის ფარგლებში იტალიურ სკოლა ,,ცისკარში" ჩატარდა ბულინგის წინააღმდეგ ბრძოლის კვირეული, განხორციელდა სხვადასხვა აქტივობები. მოსწავლეებმა დაამზადეს პლაკატები და ვიდეორგოლები, გამართეს დისკუსია. IV -XI კლასებში სკოლის ფსიქოლოგმა, ნანიკო ჯმუხაძემ, მოაწყო საინფორმაციო შეხვედრები სხვადასხვა თემებზე: "ბულინგთან ბძოლა", "ბულინგის შემთხვევის არიდება", "ბულინგის შემთხვევის აღკვეთა".  იხილეთ ვიდეორგოლი

ვულოცავთ ჩვენი სკოლის მეათეკლასელებს და ქალბატონ რუსუდან ყოინაშვილს 12 ფინალისტს შორის მოხვედრას. მათ მიერ მომზადებულმა პროექტმა ჟიურის მოწონება დაიმსახურა და 9-14 მარტს მიწვეულები არიან ფინალში მონაწილეობის მისაღებად სიცილიაზე, ქ. აგრიჯენტოში. 

იმედია გამარჯვებულები დაგვიბრუნდებიან სამშობლოში!

წარმატებას ვუსურვებთ ქალბატონ რუსუდანს და ჩვენს მეათეკლასელებს. (სოფიკო კობახიძე, ნიცა ქოქოლაძე, ქეთევან ჭიჭინაძე, ანა ლოლუა, დეა ტუგულაშვილი, მაკა ზითანიშვილი)

აგრიჯენტოში (სიცილია), ლუიჯი პირანდელოს მშობლიურ ქალაქში, ყოველწლიურად იმართება საერთაშორისო კონკურსი “Uno, nessuno e centomila” (ერთი, არავინ და ასი ათასი), რომელშიც მონაწილეობის მიღება შეუძლიათ როგორც იტალიის სკოლების მაღალ კლასის მოსწავლეებს, ასევე უცოელებს. კონკურსი მიმდინარეობს იტალიურ ენაზე.  

https://www.concorsounonessunoecentomila.it/concorso-internazionale-uno-nessuno-e-centomila-2020/

მიმდინარე წელს კონკურსში მონაწილეობენ ჩვენი სკოლის X კლასის მოსწავლეები. კონკურსზე გაიგზავნა ლიტერატურული კაფე ,,ლიბრიამოჩის“ პროექტის ფარგლებში, ლუიჯი პირანდელოს ნოველის ,,Giara” (ქვევრის) საფუძველზე მომზადებული სცენარი.

 წარმატება  მეათეკლასელებს!

იტალიური სკოლა „ცისკარი“ 15 თებერვალს 12:00 სთ-ზე გიწვევთ ღია კარის დღეზე, გაგაცნობთ ჩვენს სკოლას, პროფესიონალთა გუნდს, სასწავლო პროგრამებს, სასკოლო გარემოსა და სკოლის უპირატესობებს.

გთხოვთ, გვეწვიოთ.

2020 წლის 23 ოქტომბერს გენიალურ საბავშვო მწერლის, დიდი პედაგოგის  ჯანი როდარის დაბადებიდან 100 წელი სრულდება. იტალიური სკოლისთვის სასიამოვნო მოულედნელობა იყო, როდარის მშობლიური ქალაქიდან ომენიადან სადღესასწაულო ღონისძიებებზე მიწვევის მიღება.

იტალიური ენის პედაგოგი, რუსუდან  ყოინაშვილი, ჯანი როდარის შემოქმედების დიდი თაყვანისმცემელი, პერსონალურად არის მიწვეული იტალიელი მწერლის იუბილეზე.

იტალიური სკოლის   მოსწავლეებს კიდევ ერთხელ  მიეცათ  საკუთარი ფანტაზიის,  ნიჭის გამოვლენის საშუალება და  ლიტერატურული კაფე ,,ლიბრიამოჩის“ პროექტის ფარგლებში შექმნან საკუთარი ნახატები, თხზულებები, ნაწარმოებები და ა. შ; პროექტში მონაწილეობის მიღება, იტალიური სკოლის მოსწავლეებთან ერთად შეუძლიათ  სხვა სკოლის მოსწავლებსაც.