სიახლეები

იტალიური სკოლა მრავალი წელია, მისი სახლია, რომელსაც რიგითი ნომერი არ სჭირდება. და მაინც რომელი სახლი? სკოლა-სახლი.

ძალიან გაუხარდა, როცა ინტერვიუს ჩაწერა ვთხოვე. სიხარულს კი მხოლოდ დაკვირვებული თვალი შეამჩნევდა, რადგან თავმდაბლობა ბევრად სჭარბობდა.

- როდის და რატომ გადაწყვიტეთ გამხდარიყავით მასწავლებელი?

ჩემი პროფესია განსაკუთრებული გადაწყვეტილების შედეგი არ ყოფილა, ის თავისით მოვიდა. გერმანული სკოლის დამთავრების შემდეგ უცხო ენების ინსტიტუტში გავაგრძელე სწავლა, რომელიც პედაგოგიურიც იყო.

- გაიხსენეთ პირველი გაკვეთილი...

რა დამავიწყებს პირველ გაკვეთილს?! ინსტიტუტის დამთავრების შემდეგ ასპირანტურის ნაცვლად სოფლის სკოლაში მოვინდომე გერმანული ენის მასწავლებლობა და განაწილებით კარდენახში აღმოვჩნდი. 22 წლისა მოკლე კაბით, ზღვის რუჯით და გრძელი, გაშლილი თმებით მასწავლებელს ნამდვილად არ ვგავდი. პირველი გაკვეთილი მეათე კლასში მქონდა და ბიჭებმა  მრავალჟამიერით სცადეს ,,არევა", მაგრამ ჩემი აღტაცებული სახე რომ დაინახეს, მაშინვე შეწყვიტეს სიმღერა, მე კი, განაგრძეთ გთხოვთ-მეთქი. იმ დღის მერე არევა არც უცდიათ.

- რომელია მასწავლებლის 3 აუცილებელი მახასიათებელი?

თვალი, რომელიც ხედავს. გული, რომელსაც უყვარს და თბილი ხელი, ბავშვს რომ უწვდის გასამხნევებლად. ეს, პოეტურად, ისე - შემოქმედებითობა, ფანტაზია და შინაგანი თავისუფლება.

- რა მნიშვნელობა აქვს თქვენთვის იტალიური ენას?

ძალიან სათუთ სიმს შეეხეთ ამ კითხვით... იტალიური ენის წყალობით უმშვენიერეს სამყაროში აღმოვჩნდი და ეს უმძიმესი ჩაკეტილობის წლებიც იტალიური ენის მადლმა გადამატანინა. ამიტომ მუდამ მადლიერი ვიქნები ჩემი ბედისწერის და ჩემი დიდი მაესტრო ვანო ცაგარეიშვილის, რომელმაც წინ გადამიშალა იტალიური სამყაროს მშვენიერების მთელი პანორამა.

- რას ურჩევდით ახალგაზრდებს, რომელთაც უცხო ენის შესწავლა სურთ?

ვურჩევდი ენა ისწავლონ სულისთვის და არა სერტიფიკატისთვის. ერთი ანკარა წყაროა, მეორე კი - ტექნიკური წყალი. ენას ისწავლი მაშინ, როდესაც მას შეიყვარებ, იგრძნობ და მართლაც, იმ ერის ნაწილად იქცევი. დაიწყეთ იმ ენაზე ნათქვამი მნიშვნელოვანი ფრაზებით, ნუ შეუშინდებით ენის არცოდნას, ენა მისტიკაა და მას ჩარჩოებში ვერ მოაქცევ. დაიწყეთ ლიტერატურით, სიმღერებით, ფილმებით და არა ზმნის უღლებით. ისმინეთ, მაშინაც კი, როცა არ გესმით და მერწმუნეთ, ამგვარად უდიდეს საგანძურს შეიძენთ ახალი ენის სახით.

- ახლა რომ შეგეძლოთ, რომელ პროფესიას აირჩევდით?

ჩემ პროფესიაზე მშვენიერი პროფესია აბა რომელია? ისე, ბოლო წლებია, მთარგმნელობასაც შევბედე.

ფოტოზეც დამთანხმდა, საკუთარი წიგნის ხელში დაჭერა ვთხოვე, არ მითქვამს, რომ ჩემკენ გამოეხედა და გადავიღე.

ვთანხმდებით, ადამიანებს, მათ შორის ჩვენს უმცროს მეგობრებს, განვითარებისა და ბედნიერებისათვის ისეთ საზოგადოებაში ცხოვრება სჭირდებათ, რომლის წევრებიც ერთმანეთს პატივს უპირობოდ სცემენ - რასობრივი, ეთნიკური, სქესობრივი, რელიგიური, ... განსხვავებების მიუხედავად.

პირველ აპრილს იტალიური სკოლის მოსწავლეები მოწვეულ სტუმართან, განათლების ადმინისტრირების მაგისტრანტთან, თამარ ლორთქიფანიძესთან დისკრიმინაციის თემაზე ინტერაქციულ შეხვედრაში მონაწილეობდნენ. უსამართლო მოპყრობის სახეებისა და მათთან ბრძოლის ისტორიის მიმოხილვის შემდეგ მათ ინფორმატიული ვიდეოებიც ნახეს. რომელთაგანაც, განსაკუთრებით შთამბეჭდავი რასიზმისა და სეგრეგაციის ეფექტის გამოსავლენად შექმნილი კლარკების კლასიკური ექსპერიმენტი აღმოჩნდა. კაცობრიობის წარსული გამოცდილებებისთვის თვალის გადავლების პარალელურად მოსწავლეება იმსჯელებს საკითხებზე, რომლებიც მათივე აზრით თანამედროვე საზოგადოებისთივს დღემდე გამოწვევად რჩება. ახალგაზრდებმა დისკრიმინაციისგან უფრო თავისუფალი გარემოს უზრუნველყოფისათვის საჭირო გზების შესახებ მოსაზრებები გამოთქვეს.

ჩაგვრის წინააღმდეგ მიმართულ კამპანიას იტალიურ სკოლაში პერმანენტული ხასიათი აქვს. ჩვენი მოსწავლეები, უკვე შეუდგნენ პირველი ნამუშევრებისა და პროექტების შექმნას, რომელთაც სულ რამდენიმე დღეში იხილავთ.

30 მარტს იტალიურ სკოლაში ჩატარდა შეხვედრა პოლიტოლოგ ლევან ლორთქიფანიძესთან.

სტუმარმა მოვლენათა მიზეზ-შედეგობრივი კავშირის პრინციპებსა და საერთაშორისო ურთიერთობების ძირითად ლოგიკებზე დაყრდნობით განიხილა:

• უკრაინაში ომის, რუსეთ-საქართველოს და რეგიონის პოლიტიკური სირთულეები
• საქართველოს ევროკავშირთან ურთიერთობის ისტორია

ბატონმა ლევანმა დემოკრატიულ პროცესებში ადამიანთა აქტიური ჩართულობა ქვეყნის განვითარების ერთ-ერთ უმნიშვნელოვანეს ფაქტორად დაასახელა.

მოსწავლეებმა დასვეს შეკითხვები და გამოხატეს დადებითი უკუკავშირი.

სასკოლო პროექტის "მწვანე არჩევანი"-ს ფარგლებში, იტალიური ენის კათედრის ინიციატივით (პედაგოგები: ქეთევან სიხარულიძე, ნატალია მიჩინაშვილი, ლუკა ვერჯერიო და ეკა ლაგვილავა)  ჩვენი სკოლის VIII კლასის მოსწავლეებმა გააკეთეს თარგმანი იტალიურიდან ქართულ ენაზე ელემენტების გადამუშავების მნიშვნელობის შესახებ და წარმოადგინეს პრეზენტაციის სახით.

ამავდროულად V-VI კლასელებმა დაარიგეს საინფორმაციო ფლაერები წარწერით:"არ დააბინძუროთ გარემო!"

მესამე საფეხურის მოსწავლეებმა კი სკოლის იტალიელ პედაგოგისგან აიღეს ინტერვიუ აღნიშნულ საკითხთან დაკავშირებით. ინტერვიუს მიზანი იყო გაერკვიათ თუ რა გამოცდილებაა ამ კუთხით მეგობარ ქვეყანაში-იტალიაში.

განხორციელებულ პროექტზე მუშაობამ ხელი შეუწყო მოსწავლეთა ეკო ცნობიერების გაზრდას გლობალურ პრობლემასთან მიმართებაში.

მიმდინარე სასწავლო წელს ,სკოლის  საგნობრივი კათედრების თანამშრომლობით შეიქმნა ინტეგრირებული სასკოლო პროექტი  –  "მწვანე არჩევანი", ანუ ერთად ვიზრუნოთ, რომ 2022 წელს,  მეტმა ადამიანმა  გააკეთოს  მწვანე არჩევანი და  გალვანური ელემენტები ჩავანაცვლოთ ეფექტური ალტერნატივით და ნაგავში არ გადავყაროთ ერთჯერადი გამოყენების  ელემენტი.

პროექტი ითვალისწინებს,  დავაფიქროთ სასკოლო საზოგადოება და ვიდრე თითოეული მათგანი გამოყენებულ ელემენტს ნაგვის ურნაში ჩააგდებს,  საკუთარ თავს ერთი მნიშვნელოვანი კითხვა დაუსვას: ამ ქმედებით გარემოს ზიანს ხომ არ ვაყენებ? რადგან, როგორც ცნობილია ერთჯერადი გამოყენების  ელემენტი საკმაოდ სახიფათო ნარჩენია…

აღნიშნული პროექტის ფარგლებში, სკოლის V-VII კლასის მოსწავლეებმა ინგლისური ენის პედაგოგის, შორენა მერაბიშვილის მხარდაჭერით, გალვანური ელემენტების შესახებ მოიძიეს მეტი ინფორმაცია, შექმნეს პოსტერები და წარადგინეს პრეზენტაციები, რის შედეგადაც გაიზარდა მოსწავლეთა ცნობიერების დონე ელემენტების მავნებლობის შესახებ.

სასკოლო პროექტის მთავარი მიზანიც სწორედ ეს გახლავთ - სასკოლო საზოგადოების ეკოცნობიერების გაზრდა, მათი ინფორმირება გარემოსდაცვითი კუთხით და მდგრადი განვითარების მიზნებთან მიმართებაში.

21 მარტი დაუნის სინდრომის საერთაშორისო დღეა, რომლის მთავარი სლოგანიცაა "მეგობრები არ ითვლიან ქრომოსომებს"

გაერთიანებული ერების ორგანიზაციის ეგიდით, 2011 წლიდან 21 მარტი დაუნის სინდრომის საერთაშორისო დღედ გამოცხადდა. ორგანიზაციის ინიციატივით, “უთვალავი წინდის" ტრადიცია დამკვიდრდა. ის მასობრივი სოლიდარობის ორიგინალურად გამოხატვას ისახავს მიზნად. მსოფლიოს ბევრ ქვეყანაში, და მათ შორის საქართველოშიც, სხვადასხვა ღონისძიება და აქტივობა იმართება.

ეს აქტივობები მიმართულია საზოგადოების ინფორმირებულობის, ცნობიერების ამაღლებისა და მხარდაჭერისაკენ.

იტალიური სკოლაც შეუერთდა სოლიდარობის გლობალურ აქციას- სკოლის XI კლასის მოსწავლეებმა საბუნებისმეტყველო მეცნიერებათა კათედრის ჩართულობით ( პედაგოგი ცისია სუხიაშვილი) სასკოლო საზოგადოებას წარუდგინეს პრეზენტაცია.

მათ ისაუბრეს სინდრომის მიზეზებსა და შედეგებზე. ხაზი გაუსვეს, რომ აუცილებელია მოზარდ თაობაში  პოზიტიურად გაიზარდოს  მიმღებლობა ამ პრობლემის მქონე ადამიანების მიმართ. შეხვედრის ბოლოს გაიმართა აზრთა ურთიერთ გაზიარება.

ახალ დაარსებულ "ლიტერატურულ კლუბში" დაწყებითი კლასის მოსწავლეებისათვის პირველი შეხვედრა  გაიმართა. ლიტერატურული კლუბის მთავარი მიზანი  სკოლის  ყველაზე პატარა მოსწავლეებში  კითხვის პოპულარიზაციის ხელშეწყობა და  მათთვის  წიგნთან ურთიერთობის მნიშვნელოვანი უნარჩვევების  განვითარებაა.

პატარები ინტერაქციულად იქნებიან  ჩართულები,ექნებათ შემოქმედებითი სახის დავალებები და  აზრის  გამოხატვის  საშუალება.

ლიტერატურული კლუბის ხელმძღვანელი,ამავე სკოლის  პედაგოგი, მრავალი პროექტისა და მეთოდური სახელმძღვანელოს ავტორი,მწერალი ინგა თეთრაძეა.

პირველ  შეხვედრაზე,ქალბატონმა ინგამ თავისი წიგნის  ,,რატომელას" შესახებ  ისაუბრა.წიგნის მთავარი პერსონაჟი,კლუბის მსმენელებივით ბეჯითი და  შრომისმოყვარე,ცნობის მოყვარე და  ცელქი  ბიჭია.ბავშვები გულისყურითა და  დიდი ინტერესით უსმენდნენ მათი  თანატოლი ,,რატომელას" თავგადასავალს და  ქალბატონ ინგას  გასაოცარ თხრობას,რომელიც მთელი მონდომებითა და  სიყვარულით ცდილობდა ბავშვებს ემოგზაურათ ,,რატომელას" საინტერესო,უცნაური თავგადასავლებით სავსე  სამყაროში,სადაც მთავარი კითხვებია:რა?სად?როდის?როგორ და რაც მთავარია რატომ ხდება?

ბავშვები ხალისითა და  მონდომებით  ჩაერთვნენ კითხვის დასრულების შემდეგ აქტივობებში.დამსწრეთა უმრავლესობას მთელი წიგნი  წაკითხული ჰქონდა,ამიტომ სიხარულით  ყვებოდნენ თავის ემოციებს,იმ მნიშვნელოვან რჩევებსა  და გზავნილებზე,რაც ამ წიგნიდან მიიღეს. ქალბატონი ინგა კი, ბავშვივით ხარობდა,რომ წიგნის  ენით გადმოცემული მისი სათქმელი და მნიშვნელოვანი გზავნილები ბავშვებს ზუსტად და  სწორად  ესმოდათ.

15 მარტს, იტალიურ სკოლაში დაიწყო სასერტიფიკატო კურსი "ლიდერობა", რომელიც ითვალისწინებს თეორიული და პრაქტიკული მეცადინეობების ჩატარებას, პროექტების პრეზენტაციას.

კურსის მიზნები მოიცავს ლიდერული უნარ-ჩვევების პრაქტიკის სწავლებას მსმენელებისთბის. ასევე, დროის, იმიჯის, სხეულის ენისა და ურთიერთობის მართვის მეთოდოლოგიის სწავლებას.

კურსის დასრულების შემდეგ მოსწავლეები შეძლებენ:

• ლიდერული უნარ-ჩვევების გამომუშავებას;
• ინდივიდუალური განვითარების გეგმის ფორმირებას;
• დროის, იმიჯის, სხეულის ენის მართვის სტრატეგიის შემუშავებას;
• სტრესების, კონფლიქტების მართვის საბაზისო უნარების გამომუშავებას;
• საქმიანი ურთიერთობების სტრატეგიის შემუშავებას;

კურსს უძღვება თავად ავტორი - ეკატერინე გულუა, ეკონომიკის დოქტორი, ადამიანური პოტენციალის მართვის ლაბორატორიის დამფუძნებელი და აღმასრულებელი დირექტორი, ივანე ჯავახიშვილის სახელობის თბილისის სახელმწიფო უნივერსიტეტის ეკონომიკისა და ბიზნესის ფაკულტეტის მენეჯმენტის და ადმინისტრირების კათედრის ასისტენტ–პროფესორი.

დაე,დედებმა უკითხონ და აკითხონ შვილებს ჯანი როდარი და ომის გამჩაღებლები აღარ იარსებებენ ამ ქვეყნად!!!

Che,le mamme legano e fanno leggere ai figli Gianni Rodari e non ci sarebbero più nel mondo ispiratori delle guerre!!!

გახსოვდეს მუდამ

                             ჯანი როდარი

არსებობს რაღაც ყოველდღე საკეთებელი:

დაბანა, სწავლა, თამაში, ჭამა.

არსებობს რაღაც ღამით საკეთებელი:

თვალის დახუჭვა, ყურის დახშობა, დაძინება და სიზმრად ქცევა.

არსებობს, თუმც რაღაც არასოდეს საკეთებელი,

არც დღე, არც ღამე,

არც ზღვად, არც მიწად,

ეს არის ომი, მაგალითად!!!

 

                                                                                                                       

 

Promemoria 

                                Gianni Rodari

Ci sono cose da fare ogni giorno:

lavarsi,studiare,giocare

preparare la tavola,

a mezzogiorno.

Ci sono cose da fare di notte:

chiudere gli occhi,dormire,

avere sogni da sognare,

orecchie per non sentire.

Ci sono cose da non  fare mai

ne di giorno ne di notte,

Ne per mare ne per terra:

per esempio, la guerra

,,ცოცხალი ტყუილი"- ეს იყო  V კლასის მოსწავლეებისთვის ლიტერატურულ კლუბში მორიგი შეხვედრის თემა.

ლიტერატურისთვის ცნობილ თხრობის ამგვარ ხერხს ბავშვები უპირველესად ქართული ხალხური პოეზიის  ნიმუშებით გაეცნენ,შემდეგ მოისმინეს ,,მსოფლიოში ყველაზე მართალ კაცად" ცნობილი ,,ბარონ მიუნჰაუზენის ამბებს", წაიკითხეს რამდენიმე მოთხრობა ე. რასპეს წიგნიდან ,,მიუნჰაუზენის თავგადასავალი".

კლუბის წევრებისთვის საინტერესო  და მოულოდნელი აღმოჩნდა ვაჟა-ფშაველას მოთხრობის ,,ცრუპენტელა აღმზრდელის" პერსონაჟის მიერ ასეთივე გასაოცარი  ფანტაზიით შეთხზული ამბები.

რამდენიმე ეპიზოდი  თავად ბავშვებმა  წაიკითხეს  და  ისაუბრეს იმაზე, თუ რა კვებავს,ზოგადად ადამიანის ფანტაზიას,რატომ თხზავს ადამიანი ამგვარ დაუჯერებელ,თუმცა, მკითხველისთვის ძალზე სახალისო ამბებს.

მომავალი შეხვედრისთვის მოსწავლეებმა უნდა წარმოადგინონ  საკუთარი ესეისტური ჩანახატები ე.რასპესა და  ვაჟა-ფშაველას პერსონაჟების განმასხვავებელი ნიშნების შესახებ.

ძვირფასო დედებო! გილოცავთ! ჯანმრთელი, ბედნიერი და წარმატებული შვილებით გეხაროთ მუდამ

1 მარტს, იტალიურ სკოლაში თბილისის სახელმწიფო უნივერსიტეტის საერთაშორისო ურთიერთობების კურსდამთავრებულმა და ევროპისმცოდნეობის მაგისტრანტმა ნიკა  კრაწაშვილმა საინფორმაციო შეხვედრა გამართა სკოლის IX,X,XI კლასის მოსწავლეებთან  საერთაშორისო განათლებასა და გაცვლით პროგრამებზე.

განხილული იყო ERASMUS+,FLEX,UGRAD და უცხოეთში სწავლისა და  მოხალისეობრივი საქმიანობის სხვა შესაძლებლობები

მომხსენებლმა მოსწავლეებს გერმანიისა და საფრანგეთის უნივერსიტეტებში ERASMUS+ გაცვლით პროგრამებში მონაწილეობის გამოცდილება გაუზიარა და განათლების უცხოეთში მისაღებად განკუთვნილ კონკურსებში  წარმატებული მონაწილეობისთვის  რეკომენდაციები მისცა

იტალიური სკოლის ლიტერატურულ კლუბს II -III კლასის მოსწავლეები შემოუერთდნენ, რომელსაც უხელმძღვანელებს სკოლის პედაგოგი, მრავალი პროექტის და მეთოდური სახელმძღვანელოს  ავტორი, მწერალი  ინგა თეთრაძე.

 

კლუბის ფარგლებში გაერთიანება ხელს  უწყობს მოსწავლეთა  თვალსაწიერის გაფართოებას, ლიტერატურისა და წიგნის  სიყვარულს, კრეატიული აზროვნების განვითარებას

15 მარტს შედგება პატარების პირველი სტუმრობა ლიტერატურულ კლუბში.

განათლების სამინისტროს ელექტრონულ ჟურნალში გამოქვეყნდა იტალიური სკოლის პედაგოგების მეთოდური მასალები (ნანა ვაჩიბერიძე - კომპლექსური დავალება და შეფასების რუბრიკა, ინგა თეთრაძე - სახალისო კომპლექსური დავალება).

ვულოცავთ ქალბატონ ნანა ვაჩიბერიძეს  და ქალბატონ ინგა თეთრაძეს ამ დიდ წარმატებას. ჩვენი პედაგოგების წარმატება, სკოლის და თითოეული ჩვენგანის წარმატებაა. დიდი მადლობა ქალბატონ მანანა ბოჭორიშვილს პედაგოგების ასეთი მხარდაჭერისთვის.

განსაკუთრებული მადლობა  თავად ავტორებს, ასე რომ გვანებივრებთ თქვენი წარმატებებით!

იტალიური სკოლა ულოცავს სასკოლო საზოგადოებას ISO ხარისხის მართვის რესერტიფიცირების აუდიტის წარმატებით გავლას და მომდევნო 3 წლით სერტიფიკაციის გაგრძელებას.

ასევე მადლობა გვინდა გადავუხადოთ მთელ სასკოლო გუნდს პროფესიონალიზმის კიდევ ერთხელ დადასტურებისთვის -გარე აუდიტთან ქალბატონ ჯავიდან მალიკოვასთან (Intertek Int. წარმომადგენელთან.)

ISO 9001:2015 ხარისხის მართვის სისტემის საერთაშორისო სტანდარტია და ამ სერტიფიკატის ფლობა ნიშნავს, რომ ორგანიზაციის საქმიანობა შეესაბამება საერთაშორისო ნორმებს, როგორც საგანმანათლებლო, ისე მენეჯმენტის კუთხით

 

4 ნოემბერს,ლიტერატურულ კაფეს ,,ლიბრიამოჩი"-ს 4 წელი შეუსრულდა.

ჩვენი სკოლის ბიბლიოთეკაში ერთმანეთს შეხვდნენ პირველი და ახალი თაობის მოსწავლეები.

სკოლის დირექტორმა, ქ-ნ მაია ლაგვილავამ, რომლის  წყალობითაც  შეიქმნა  ეს  შემოქმედებითი სივრცე, მოსწავლეებს მიულოცა  4  წლის  იუბილე

ხუთშაბათს, 28 ოქტომბერს, oikos Tbilisi  იტალიური სკოლა ცისკარი - Italian School Tsiskari-ის IX-X-XI კლასის მოსწავლეებს შეხვდა. შეხვედრა მიზნად ისახავდა სკოლის მოსწავლეებისთვის ცნობიერების ამაღლებას მდგრადი განვითარების მიმართულებით.

მოსწავლეებმა შეიტყვეს oikos International-ისა და oikos Tbilisi-ს საქმიანობის შესახებ, იმსჯელეს ეკონომიკაში, საზოგადოებასა და ეკოლოგიაში არსებულ გამოწვევებზე, შეხვედრის ბოლოს კი ითამაშეს “GoGoals”, რომლის საშუალებითაც უკეთ გაეცნენ მდგრადი განვითარების მიზნებს.

იტალიურ სკოლა “ცისკარი”  მადლობას უხდის  oikos Tbilisi  თანამშრომლობისათვის და შეხვედრის თითოეულ მონაწილეს აქტიური ჩართულობისათვის

2021 წლის 28 და 29  ოქტომბერს, იტალიური სკოლის მოსწავლეები სტუმრად იმყოფებოდნენ სიმონ ჯანაშიას სახელობის მუზეუმში,სადაც შესაძლებლობა  ჰქონდათ ენახათ  გამოფენა “სიცოცხლე და სიკვდილი: დიდებული პომპეი", რომელზეც წარმოდგენილი არის არქეოლოგიური მასალა პომპეის არქეოლოგიური პარკიდან.

გამოფენა, რომელიც საქართველოს პირველად სტუმრობს, ივლისის თვეში ვანის არქეოლოგიურ მუზეუმში გაიხსნა, ახლა კი თბილისის შუაგულში, სიმონ ჯანაშიას სახელობის სახელმწიფო მუზეუმში გადმოინაცვლა.

ექსპოზიცია დამთვალიერებელს სთავაზობს, გაეცნოს ორი ათასი წლის წინ მომხდარი ვულკანის ამოფრქვევის შედეგად განადგურებული ანტიკური ქალაქის ყოფასა და ყოველდღიურობას. გამოფენაზე წარმოდგენილია ისეთი არტეფაქტები, როგორიცაა ჭურჭელი, საყოფაცხოვრებო ნივთები, ორნამენტები, არქიტექტურული დეკორი, სკულპტურები და ფრესკები, რომლებიც ოდესღაც ანტიკური ქალაქის სახლების კედლებს ამშვენებდა, ასევე, ძვირფასი სამკაულები და ახ. წ. 79 წელს ვეზუვის ამოფრქვევის შედეგად დაღუპულთა თაბაშირის ფიგურები.

ექსპოზიცია, რომლის კურატორი პომპეის არქეოლოგიური პარკია, საქართველოში ტარდება იტალიის საელჩოსა და საქართველოს ეროვნული მუზეუმის ორგანიზებით და იტალიურ კომპანია "Glocal Project Consulting"-სთან თანამშრომლობით. ექსპოზიცია იმ საგამოფენო ინიციატივების გაგრძელებაა, რომლებიც უკანასკნელ წლებში იტალიის საელჩოს ხელშეწყობით გაიმართა და უპრეცედენტო წარმატებას მიაღწია: ეს გამოფენები 250.000 დამთვალიერებელმა მოინახულა.

ძვირფასო მოსწავლეებო, მასწავლებლებო და მშობლებო, გილოცავთ პანდემიით გამოწვეული პაუზის შემდეგ სასკოლო სივრცეში სასწავლო პროცესის დაწყებას.

საიუბილეო, სკოლის დაარსების  25-ე  სასწავლო წელს  განსაკუთრებით ვულოცავთ ჩვენი სკოლის საერთაშორისო სწავლების იტალიური  სექტორის გამოსაშვები ჯგუფის მოსწავლეებსა და პირველკლასელებს.

დღეს სკოლას ესტუმრა   იტალიის სრულუფლებიანი და საგანგებო ელჩი საქართველოში ბატონი ენრიკო ვალვო,ბატონმა ელჩმა მოსწავლეებს მიულოცა  წლევანდელი საიუბილეო წელი და წარმატებები უსურვა.

სკოლაში პირველკლასელებისთვის, ტრადიციულად გაიმართა  საგანგებო ზეიმი. სკოლის კედლებს დაუბრუნდა სიცოცხლე და მოსწავლეთა ჟრიამული.

სასწავლო პროცესი გაგრძელდება  ზოგადსაგანმანათლებლო დაწესებულებებისთვის, ახალი კორონავირუსით გამოწვეულ ინფექციასთან, დაკავშირებული რეკომენდაციების გათვალისწინებით. ამასთანავე აღსანიშნავია, რომ იტალიური სკოლის თანამშრომელთა 90%-ზე მეტი  და მოსწავლეთა მშობლების 80%-ზე მეტი სრულად ვაქცინირებულია.

დღეს,21 ივლისს,იტალიურ სკოლას  და  ,,ფიუჩერ ლაბორატორის"   შორის  გაფორმდა  ხელშეკრულება,რომელიც ითვალისწინებს  მომავლის პროფესიების სწავლების დანერგვას და შესაბამისი ინფრასტრუქტურის შექმნას სკოლის ბაზაზე.

ხელშეკრულების  ფარგლებში  ახალი სასწავლო წლიდან მოხდება ისეთი მიმართულებების სწავლების დაწყება, როგორიც არის: 123D Design-ის/Tinkerkad-ის პროგრამაში 3D მოდელირების სწავლება, Mbot-ის კონსტრუქტორის აწყობისა და მისი დაპროგრამების სწავლება, მიკროელექტრონიკა Arduino-სა და სენსორების გამოყენებით, ვიზუალური პროგრამირება Scratch-ის პროგრამული ენის გამოყენებით, ინტერიერის დიზაინისა და 2D გეგმების შექმნა.

მემორანდუმს  ხელი მოაწერეს იტალიური სკოლის  დირექტორმა ქ-ნ მაია ლაგვილავამ და შპს. ,,ფიუჩერ ლაბორატორის" გენერალურმა დირექრორმა ბ-ნ ირაკლი ქაშიბაძემ.