• უსაფრთხო სკოლა

          • უსაფრთხო სკოლის კონცეფციის ფარგლებში იტალიურ სკოლა ,,ცისკარში" ჩატარდა ბულინგის წინააღმდეგ ბრძოლის კვირეული, განხორციელდა სხვადასხვა აქტივობები. მოსწავლეებმა დაამზადეს პლაკატები და ვიდეორგოლები, გამართეს დისკუსია. IV -XI კლასებში სკოლის ფსიქოლოგმა, ნანიკო ჯმუხაძემ, მოაწყო საინფორმაციო შეხვედრები სხვადასხვა თემებზე: "ბულინგთან ბძოლა", "ბულინგის შემთხვევის არიდება", "ბულინგის შემთხვევის აღკვეთა".  იხილეთ ვიდეორგოლი

          • “Uno, nessuno e centomila” ფინალისტები

          • ვულოცავთ ჩვენი სკოლის მეათეკლასელებს და ქალბატონ რუსუდან ყოინაშვილს 12 ფინალისტს შორის მოხვედრას. მათ მიერ მომზადებულმა პროექტმა ჟიურის მოწონება დაიმსახურა და 9-14 მარტს მიწვეულები არიან ფინალში მონაწილეობის მისაღებად სიცილიაზე, ქ. აგრიჯენტოში. 

            იმედია გამარჯვებულები დაგვიბრუნდებიან სამშობლოში!

            წარმატებას ვუსურვებთ ქალბატონ რუსუდანს და ჩვენს მეათეკლასელებს. (სოფიკო კობახიძე, ნიცა ქოქოლაძე, ქეთევან ჭიჭინაძე, ანა ლოლუა, დეა ტუგულაშვილი, მაკა ზითანიშვილი)

          • Concorso “Uno, nessuno e centomila” 2020

          • აგრიჯენტოში (სიცილია), ლუიჯი პირანდელოს მშობლიურ ქალაქში, ყოველწლიურად იმართება საერთაშორისო კონკურსი “Uno, nessuno e centomila” (ერთი, არავინ და ასი ათასი), რომელშიც მონაწილეობის მიღება შეუძლიათ როგორც იტალიის სკოლების მაღალ კლასის მოსწავლეებს, ასევე უცოელებს. კონკურსი მიმდინარეობს იტალიურ ენაზე.  

            https://www.concorsounonessunoecentomila.it/concorso-internazionale-uno-nessuno-e-centomila-2020/

            მიმდინარე წელს კონკურსში მონაწილეობენ ჩვენი სკოლის X კლასის მოსწავლეები. კონკურსზე გაიგზავნა ლიტერატურული კაფე ,,ლიბრიამოჩის“ პროექტის ფარგლებში, ლუიჯი პირანდელოს ნოველის ,,Giara” (ქვევრის) საფუძველზე მომზადებული სცენარი.

             წარმატება  მეათეკლასელებს!

          • 15 თებერვალი - ღია კარის დღე

          • იტალიური სკოლა „ცისკარი“ 15 თებერვალს 12:00 სთ-ზე გიწვევთ ღია კარის დღეზე, გაგაცნობთ ჩვენს სკოლას, პროფესიონალთა გუნდს, სასწავლო პროგრამებს, სასკოლო გარემოსა და სკოლის უპირატესობებს.

            გთხოვთ, გვეწვიოთ.

          • ჯანი როდარის 100 წლისთავი

          • 2020 წლის 23 ოქტომბერს გენიალურ საბავშვო მწერლის, დიდი პედაგოგის  ჯანი როდარის დაბადებიდან 100 წელი სრულდება. იტალიური სკოლისთვის სასიამოვნო მოულედნელობა იყო, როდარის მშობლიური ქალაქიდან ომენიადან სადღესასწაულო ღონისძიებებზე მიწვევის მიღება.

            იტალიური ენის პედაგოგი, რუსუდან  ყოინაშვილი, ჯანი როდარის შემოქმედების დიდი თაყვანისმცემელი, პერსონალურად არის მიწვეული იტალიელი მწერლის იუბილეზე.

            იტალიური სკოლის   მოსწავლეებს კიდევ ერთხელ  მიეცათ  საკუთარი ფანტაზიის,  ნიჭის გამოვლენის საშუალება და  ლიტერატურული კაფე ,,ლიბრიამოჩის“ პროექტის ფარგლებში შექმნან საკუთარი ნახატები, თხზულებები, ნაწარმოებები და ა. შ; პროექტში მონაწილეობის მიღება, იტალიური სკოლის მოსწავლეებთან ერთად შეუძლიათ  სხვა სკოლის მოსწავლებსაც.

          • LA VITA E BELLA!

          • 29 დეკემბერს, იტალიურმა სკოლამ და  საქველმოქმედო ფონდმა “ცხოვრება მშვენიერია” ერთად განახორციელეს საქველმოქმედო აქცია.

            სოციალურად დაუცველ 10 ოჯახს საკვები პროდუქტები, საახალწლო ტკბილეული და ზამთრის ტანსაცმელი გადაეცათ  “ერიდეთ ყველაფერს რაც გადამდებია, სიკეთის გარდა” - ”ცხოვრება მშვენიერია” - LA VITA E BELLA!  

          • ერიდეთ ყველაფერს რაც გადამდებია სიკეთის გარდა

          • 27 და 28 დეკემბერს ფონდმა “ცხოვრება მშვენიერიამ”  ორდღიანი საქველმოქმედო აქცია განახორციელა იტალიურ სკოლის მოსწავლეებთან ერთად.

             

            27 დეკემბერს ვესტუმრეთ სათნოების სახლში “თხილის გული” და გემრიელი კერძებით გავუმასპინძლდით 200 -ზე მეტ ბენეფიციარს, ასევე გადავეცით ზამთრისთვის განკუთვნილი თბილი ტანსაცმელი.

            28 დეკემბერს, იტალიური სკოლის ბავშვებთან ერთად სტუმრად ვიყავით სათნოების სახლში “კათარზისი” და 350-ზე მეტ ადამიანს გავუმასპინძლდით გემრიელი კერძებით.

            სადილის ბოლოს ჩვენი საყვარელი ხანდაზმული ადამიანების წინაშე წარსდგა ყველასათვის საყვარელი მომღერალი და არტისტი, ბატონი ვახტანგ ტატიშვილი.

          • საშობაო ბაზრობა

          • 20 დეკემბერს, იტალიურ სკოლაში გაიმართა საშობაო, საქველმოქმედო ბაზრობა.

            სიკეთე გადამდებია

            უღრმესი მადლობა, მოსწავლეებს, მშობლებს, პედაგოგებს, განსაკუთრებით კლასის დამრიგებლებსა და ხელოვნების პედაგოგს, საშობაოდ სოციალურად დაუცველი ოჯახების დასახმარებლად, გამოჩენილი თანადგომისა და მხარდაჭერისთვის.

          • მოსწავლეთა კონფერენცია

          • საქართველოს უნივერსიტეტის მეცნიერებისა და ტექნოლოგიების სკოლამ, თბილისის ი. ვეკუას სახელობის 42-ე მათემატიკურ სკოლასთან ერთად, მონაწილეობა მიიღო შოთა რუსთაველის ეროვნული სამეცნიერო ფონდის მიერ გამოცხადებულ 2019 წლის სახელმწიფო სამეცნიერო საგრანტო კონკურსში - „მეცნიერება იწყება სკოლიდან - კვლევები მოსწავლეთა მონაწილეობით“. პროექტის ფარგლებში, 19 დეკემბერს საქართველოს უნივერსიტეტში ჩატარდა მოსწავლეთა კონფერენცია, სადაც მონაწილეობას იღებდნენ 42-ე სკოლის და იტალიური სკოლა "ცისკარი"-ს მოსწავლეები. მათ წარმოადგინეს შემდეგი მოხსენებები:

            1. „სერპინსკის ფუნქცია“ - მომხსენებლები: მეათე კლასის მოსწავლეები ანა პაპიძე და ელენე ნიკურაძე.

            2. „კანტორის თეორემა“ - მომხსენებლები: მეათე კლასის მოსწავლეები ქეთი ჭიჭინაძე და ქეთი მაჭავარიანი.

            3. "წრფივი დაპროგრამება ოპტიმიზაციის ამოცანებში" - მომხსენებლები: მეთერთმეტე კლასის მოსწავლეები თათია ბარელაძე, ნინი ბოჭორიშვილი და მარიამ ჯოლოგუა.

            4. "ალგებრის ფესვები" - მომხსენებლები: მეთერთმეტე კლასის მოსწავლეები ლუკა გიორგიძე, თიკო გადილია, დავით ხაჩიძე და ანი ასანიძე.

            მეცნიერებისა და ტექნოლოგიების სკოლამ კონკურსზე წარადგინა თემა: „ფუნქციონალური მეთოდები სიმრავლეთა თეორიაში“ და მოიპოვა გრანტი.

            პროექტის მონაწილეები: ილია ვეკუას სახ. თბილისის 42-ე საჯარო სკოლა, იტალიური სკოლა ცისკარი - Italian School Tsiskari და საქართველოს უნივერსიტეტი.

            პროექტის ხელმძღვანელი: ფიზიკა-მათემატიკის მეცნიერებათა დოქტორი, აკად. ი. ვეკუას სახელობის 42-ე ფიზიკა-მათემატიკური სკოლის მათემატიკის მასწავლებელი კონსტანტინე კუპატაძე.

            პროექტის მეცნიერ-კონსულტანტი: საქართველოს უნივერსიტეტის მეცნიერებისა და ტექნოლოგიების სკოლის ასოცირებული პროფესორი ქეთევან კუთხაშვილი.

            პროექტის ასისტენტი: საქართველოს უნივერსიტეტის მაგისტრანტი დავით თარაშვილი.

          • ჭადრაკის ტურნირი

          • 16 დეკემბერს, იტლიურ სკოლაში გაიმართა ჭადრაკის ტურნირში მონაწილე მოსწავლეთა დაჯილდოება
             29 ნოემბრიდან მიმდინარე ჭადრაკის ტურნირში II - V კლასის მოსწავლეები მონაწილეობდნენ. ტურნირი დაძაბულად მიმდინარეობდა, როგორც ვაჟებში ასევე გოგონებში. გამოვლინდნენ გამარჯვებულები - I, II, III ადგილის მფლობელები

          • ამხანაგური შეჯიბრი

          • 11 დეკემბერს, ქ. თბილისის 23-ე საჯარო სკოლის სპორტულ დარბაზში, იტალიური სკოლისა და 23-ე საჯარო სკოლის მოსწავლეებს შორის, გაიმართა ამხანაგური შეჯიბრი კალათბურთში. შეჯიბრში მონაწილეობდნენ მე-6 კლასის მოსწავლე ვაჟები. შეჯიბრი იტალიური სკოლის კალათბურთელთა გამარჯვებით დამთავრდა.

            დამაჯერებელი ანგარიშით 45:4 გაიმარჯვა იტალიური სკოლის კალათბურთელთა გუნდმა  

          • მინიატურული სპექტაკლი

          • 2019 წლის 6 დეკემბერს, I/2კლასის მოსწავლეებმა იტალიური სკოლის სცენაზე წარმოადგინეს მინიატურული სპექტაკლი ,,გაეხადა ბაღს სამოსი“. სცენარის ავტორი და რეჟისორი - პედაგოგი, ინგა თეთრაძე; მუსიკალური გაფორმება - მარინა ლეკიშვილი, დეკორატორი - დინა კუჭაძე.

            პატარა მსახიობებმა დაიპყრეს დარბაზი: მხიარული ჰანგები,  გემოვნებით გაფორმებული მუსიკალური სცენები, შემოდგომის ხვავი და ბარაქა. ამ დღეს განსაკუთრებული ხიბლი შესძინა კლასის დამრიგებლის პოეტურობამ და გამორჩეულმა ფანტაზიის უნარმა.

             I/2კლასის მოსწავლეებს მუდამ ემახსოვრებათ მათი პირველი სასკოლო ზეიმის დღე - 2019 წლის 6 დეკემბრი

          • განსაკუთრებული სტუმარი

          • 5 დეკემბერს, იტალიურ სკოლაში სტუმრად იმყოფებოდა განსაკუთრებული სტუმარი, საქართველოს ეროვნული ნაკრებისა და თბილისის დინამოს ფეხბურთელი ლევან მჭედლიძე და მისი მეგობარი, თბილისის დინამოს ფეხბურთელი ნოდარ იაშვილი.

            სკოლის მოსწავლეები დიდი ინტერესით ელოდნენ სტუმრებს. შეხვედრამ ძალიან საინტერესო გარემოში ჩაიარა. ბავშვებს მომზადებული ჰქონდათ შეკითხვები და სტუმრებმაც ამომწურავად გასცეს პასუხები, გაუზიარეს თავიანთი გამოცდილება და შეხედულება ფეხბურთის გარშემო.

            შეხვედრის ბოლოს სტუმრებმა დაარიგეს ავტოგრაფები და გადაიღეს ფოტოები
            ეს დღე ნამდვილად არ დაავიწყდებათ იტალიური სკოლის მოსწავლეებს

          • შეხვედრა მოძღვართან

          • 2019 წლის 28 ნოემბერს იტალიური სკოლა ,,ცისკრის" 5-2 და 6-1 კლასის მოსწავლეებმა (პედაგოგი მაია ხაჭაპურიძე), უმასპინძლეს ჯვარის მამას მოძღვარს პოეტ - დეკანოზს თავმას ჩოხელს.

            მოსწავლეებმა საინტერესოდ და შთამბეჭდავად წაიკითხეს “სიყვარულის მოძღვრის” ლექსები, ცხოვრების გზა, მოისმინეს “სიყვარულის სახელით ამღერებული ლექსები”, მათ შორის 5 “იავნანას” ავტორის მამა თავმასის საოცარი “იავნანები” (კომპოზიტორი დავით არჩვაძე), მისივე შესრულებით სიმღერა “აფხაზეთის მონატრება”. ასევე მოძღვრის სტუმარმა ნიკოლოზ ოთანაძემ ფანდურზე შეასრულა რამდენიმე სიმღერა, რომლითაც განსაკუთრებული შთაბეჭდილება მოახდინა მსმენელზე.

            მოძღვარმა მადლობა გადაუხადა მოსწავლეებს გულთბილი შეხვედრისათვის, დაარიგა: “უყვარდეთ წიგნი, სამშობლო, შეიყვარონ ერთმანეთი და სულიერებით გაძლიერდნენ”. ეს თბილი და სიყვარულით სავსე შეხვედრა დიდხანს ემახსოვრებათ იტალიური სკოლის მოსწავლეებს

          • შეხვედრა ქართველ ისტორიკოსთან

          • 2019 წლის 19 ნოემბერს, იტალიური სკოლის X და XI კლასის მოსწავლეები სტუმრად იმყოფებოდნენ ხელოვნების სასახლეში,  სადაც შედგა შეხვედრა ქართველ ისტორიკოსთან, ისტორიულ მეცნიერებათა დოქტორთან, პროფესორთან ბ-ნ გიორგი კალანდიასთან.

            სკოლის მოსწავლეებმა დაათვალიერეს ხელოვნების სასახლეში დაცული ხელოვნების ნიმუშები. შეხვედრა იმდენად საინტერესო იყო, რომ დაიგეგმა დეკემბრის თვეში მორიგი შეხვედრა პროფესორ გიორგი კალანდიასთან.

          • იტალიელი სტუმრები

          • 9 ნოემბრიდან  სკოლა ,,ცისკარი“ მასპინძლობს იტალიელ სტუმრებს.  ორი ათეული წელი სრულდება, რაც   სასწავლო-გაცვლითი პროექტის ფარგლებში,  იტალიის  სკოლების მოსწავლეები ყოველწლიურად ჩამოდიან  ,,ცისკარში“.

            ამ ეტაპზე  ჩვენი სტუმრები არიან ქ. ბორგომანეროს პიერო გობეტის სახელობის სკოლის მოსწავლეები, პედაგოგთან ვალენტინა ძანეტასთან და   სკოლის ვიცე პრეზიდენტთან მასიმო ძანეტასთან ერთად. იტალიელი მოსწავლეები ტრადიციულად  ქართველი თანატოლების ოჯახებში ცხოვრობენ. გარდა სასკოლო-სასწავლო აქტივობებისა, პროექტის ფარგლებში, პროგრამაში შედის  ექსკურსიები, გასართობი კულტურული ღონისძიებები.

          • "შემოდგომის ვერნისაჟი"

          • იტალიურ სკოლაში მოეწყო I-დან VI კლასის მოსწავლეთა ნამუშევრების გამოფენა. სახვითი და გამოყენებითი ხელოვნების პედაგოგი ეკატერინე მელქაძე

            31/10/2019

          • მეგობრული შეხვედრა

          • 31 ოქტომბერს, ბაქსვუდის სკოლის ინიციატივით შედგა მეგობრული შეხვედრა ბაქსვუდისა და იტალიური სკოლის მოსწავლეებს შორის ფეხბურთსა და კალათბურთში (V და VI კლასები). ფეხბურთში გაიმარჯვეს ბაქსვუდის სკოლის მოსწავლეებმა. კალათბურთში დამაჯერებელი ანგარიშით გაიმარჯვეს იტალიური სკოლის მოსწავლეებმა

          • მოსწავლეებისა და პედაგოგების დაჯილდოვება

          • 2019 წლის 18 ოქტომბერი, უჩვეულო დღე გახლდათ, ეს იყო  მოსწავლეებისა და პედაგოგების დაჯილდოვების დღე.

            2018-19 სასწავლო წლის შედეგების მიხედვით  დაჯილდოვდნენ  მაღალრეიტინგული მოსწავლეები:

            ყველაზე  მაღალი რეიტინგის, პირველ ადგილზე გასულ მე-11 კლასის  მოსწავლეს, მარია კარავასილისს გადაეცა დიპლომი და  დაჯილდოვდა  პერსონალური კომპიუტერით;

            მეორე ადგილზე გასულ მე-11 კლასის  მოსწავლეს, მარიამ ჩახავას გადაეცა დიპლომი და   დაჯილდოვდა პლანშეტური კომპიუტერით;

            მესამე ადგილზე გასულ მე-10 კლასის მოსწავლეს დეა ტუგულაშვილს გადაეცა დიპლომი და   დაჯილდოვდა ,,ბიბლუსის“ 100 ლარის ღირებულების სასაჩუქრე ბარათით-,,ვაუჩერით“.

            მეოთხე ადგილზე გასულ  მე-11 კლასის მოსწავლეს ლილი კერესელიძესა და მეხუთე ადგილზე გასულ მე-10 კლასის მოსწავლეს  ნიცა ქოქოლაძეს გადაეცათ დიპლომები. რეიტინგული სისტემის პირველ ათეულში მოხვდნენ მე-10 კლასის მოსწავლები: ანა ლოლუა,  ქეთევან ჭიჭინაძე, სოფო კობახიძე და მე-11 კლასის მოსწავლეები: ნატალია ხიტალიშვილი, მაკა ზითანიშვილი. 

            ამავე დღეს საგნობრივმა კათედრებმა 2018-19 სასწავლო წელს მაღალი აკადემიური მოსწრებისა და კათედრის ღონისძიებებში აქტიური მონაწილეობისათვის დააჯილდოვეს მოსწავლეები, რომელთაც  სამახსოვროდ  გადაეცათ  წიგნები. ქართული ენისა და ლიტერატურის კათედრამ დააჯილდოვა მე-12 კლასის მოსწავლე ნატა ლაშქარაშვილი; იტალიური ენის კათედრამ - მე-9 კლასის მოსწავლე ანა ტლაშაძე და მე-11 კლასის მოსწავლე მარიამ ჩახავა; ინგლისური ენის კათედრამ -  მე-10 კლასის მოსწავლე ანა ლოლუა და მე-11 კლასის მოსწავლე მარია კარავასილისი; მათემატიკისა და საინფორმაციო ტექნოლოგიების კათედრამ - მე-9 კლასის მოსწავლე ანასტასია კვარაცხელია და  მე-8 კლასის მოსწავლე რუსუდან ტაბატაძე; საბუნებისმეტყველო კათედრამ - მე-9 კლასის მოსწავლე თამთა ათოშვილი; საზოგადოებრივი მეცნიერებების კათედრამ -  მე-11 კლასის  მოსწავლე მარია კარავასილისი და მე-8 კლასის მოსწავლე ნატალია ჭიჭინაძე; ესთეტიკური აღზრდისა და სპორტის კათედრამ - მე-9 კლასის მოსწავლე სანდრო პაპასკირი.

            2018-19 სასწავლო წლის CILS-ის სასერტიფიკაციო გამოცდებისთვის მოსწავლეთა მომზადების ხარისხისა და მიღწეული მაღალი შედეგისათვის სიგელით  დაჯილდოვდა იტალიური ენის პედაგოგი ნატა მიჩინაშვილი.

            2018-19 სასწავლო წლის ყველაზე მაღალი რეიტინგისათვის ფულადი ჯილდოთი  და სიგელით დაჯილდოვდა დაწყებითი კლასების კათედრა და მისი ხელმძღვანელი ნანა ვაჩიბერიძე.

            დასასრულს,  სკოლის ღვაწლმოსილ პედაგოგს ლია მეფარიშვილს ხანგრძლივი და ნაყოფიერი საქმიანობისათვის გადაეცა  მადლობის სიგელი და ფულადი ჯილდო.

            2019 წლის 18 ოქტომბრის შთაბეჭდილება დიდხანს გაყვება   იტალიური სკოლის მოსწავლეებსა და პედაგოგებს.

          • European Day of Languages 2019 - ენების ევროპული დღე 2019

          • 28 სექტემბერს, იტალიური სკოლა მონაწილეობდა კავკასიის ფრანგულ სკოლაში გამართულ ენების ევროპული დღისადმი მიძღვნილ ღონისძიებაში (2001 წლიდან, ევროპის საბჭოს ინიციატივითა და ევროკომისიის მხარდაჭერით, ყოველ წლიურად 26 სექტემბერს, აღინიშნება ენების ევროპული დღე).

            იტალიური სკოლის XI კლასის მოსწავლემ, მარიამ ჩახავამ იტალიურ და ქართულ ენებზე წაიკითხა ლეონარდო და ვინჩის ზღაპარი ,,აბრეშუმის ჭია". ღონისძიების დასასრულს სხვადასხვა სკოლებიდან მოწვეულ მოსწავლეებთან ერთად ფერადი ფანქრებითა და ძაფებით შეიქმნა ხელნაკეთი აბრეუმის ჭია.